It Inantadon dot riniba - Rungus om bansa vokon dit nokogulu rumungkap sid Borneo

Kanangan ko it kenempurasan dit ongo anthropologist dit inantadon dot riniba kodori, sid iso ot ngilid, mad kematan dot nentapatan no banal dot it boros dot kitab dot iti riba diti antad sid iso ot ondu o miso ot kusai, inono i Adam om i Hawa. Sid ngilid koduvo, koluvo ong it taman eden dino nga sid Afrika Utara, sid sibak dot gurun Sahara. Nga ong it sid kitab gima iri mad banal no ko avantang it putanaon sid taman Eden. Topot ong sinod sibak dot guru Sahara dino, mad kobuatano ong amu no tantu osubul it tana dau. Tau no ma, dati, ong varo no kinosimbanan dit putanaon antad kagama dit Kinoringan iti pomogunan. Kasip oku dot varo kinosimbanan tu it linusuvon it pomogunan hiza di nabi Noah diri, tantu kagama dot osimban it kobuatano dit putanaon dot pomogunan.



Rajawan 1: It Inantadon dot Riniba Kodori

 It rontob nelaan ku, inot ihud dot rinungkapon (migrasi) dit riniba kodori dino, inimumui dioti (ahli antroplogi) antad sid pola dit umul dot artifak riniba kodori. Iri ogi, inimatan dioti it pola dot DNA dit ongo artifak dino. Iri ogi it pola dot ‘Y Cromosome’ dit riniba. Antad sino, nagaranggai no kavi mongimpuras it inantadon om ihud dot rinungkapon dit riniba kodori (manusia purba) sampai nokotongkop do pomogunan.



Rajawan 2: Ihud dot Rinungkapon dit Riniba Kodori



Ilot ihud dot otomou dilo, nempurasan antad sid ‘Y Chromosome Marker’ om ilot ihud dot osilow dilo nempurasan antad sid ‘mtDNA Markers’. Harati varo duvo ot inanu dioti dot pongimpuras dit ihud dot rinungkapon dit riniba kodori, inono ‘Y Chromosome Marker’ om ‘mtDNA Markers’. Mokoduvo-duvo inot pinongimpuras dioti dino nga pinopemot dot mirad ot pattern dau. Harati ko obuli osipon tokou inot nahadjangan dioti dino.

Antad sinod rajawan 2 dino, empurasan banal dot it mikoduvo-duvo ilot ihud dot rinungkapon (ilot varo label dot M4 om M) nakavaza sid Borneo, antad kavi silod putanaan tagazo dot Asia. Ong imatan tokou ilot M4 (Y Chromosome Markers), notontuan no dot nokorikot it riniba sitid Borneo sampai silod ongo puru dot Sulawesi om Irianjaya dit 10 ribu toun nakatalib (imatan sid table it umul dot ihud). Ong imatan sid ihud dot osilow, kilabel dot M (mtDNA Markers), notontuan no dot nokorikot no sid Borneo it riba kodori antad po dit 60 ribu toun nakatalib.

Ong imatan sid iso ot ngilid, atalahas no dot sokoviai it riniba, iso ot inantadon om songrumpungan. It riniba ong kopitatatak no dot intoronon, milo sumimban it boros dau. Purimon ku inono it kagama, it elo mongitung om mamaal dot pongilaan vagu iti riniba. Sera dot varo potigamaan om amu elaan kuran momoros, na tumimpuun no mogihim dot panambarasan iti riniba tu vazaan patarang dit kenginan dau. Ino proses yadkeno milolombus-lombus turun tumurun sampai no ong kagama dot iso ot boros dot banal no ko ompangod keningan.

Ino proses dot sampai kagama dot iso ot boros dot bansa dino okon ko oduruk. Varo dati tongo rinibuvan toun ot proses dau om kagama ogi dot iso ot boros (bahasa) dot nasanganu dot iso ot bansa. Om aso no dati ot mimbulai ot boros vagu ong biano no tu mad tanid no vagu it notoguvangan dit riniba. Gam-gam po mad varo boros dot mad mokitatanus ong kalaid. Itit ituduk iti boros Kadazandusun sid sikul biano no ong dohon dot pngitungan, mad katanus dit boros tokou Rungus. Inot boros Kadazandusun dino pinopiaamung dioti it ongo boros dot Kadazan om Dusun sid Sabah topot it grammar dau antad sid iso ot boros dot Kadazan (amu ahandaman ku antad boros dot bansa nunu topot apasti ku dot okon ko dang Rungus dot grammar).

Osorow ku dot, ong hatus toun rumikot, it kalandai adau biano it anganak om sid sekolah rendah po nga marajal no dot boros Kadazandusun versi vagu, sera osukod yosido, amu no kelo yosido momoros dot Rungus. Ontuvan no kagi dot it Rungus biano no, mad ogumu it amu kumiboros dit anganak dau sid valai dot boros Rungus. Purimon ku ong penlaid madko iti, hatus toun rumikot, it boros dot bansa vokon dot KDM tumanus no om baiko it boros Kadazandusun versi vagu po ot elaan dit ongo muaki ditokou. It riniba, okon ko koviai onga kadapat barajal sampai 4 ot boros (bahasa). Imatai pogi, ong kamung inot boros Kadazandusun, it anganak tokou, operlu barajal dot boros Rungus, Kadazandusun versi dang sikul, bahasa melayu om English language. Avantang dara ong elaan kavi ino boros dino, topot minsan ko tolu nga okon ko koviai kadapat misisingilo, ino po ko ong sampai 4 ot boros pisisingilaan. Pongovian no, na terpaksa iduanan no misisingilo it boros Rungus tu amu nakadjal sid sikul ong ino ka. Ong ajadi ino, it boros tokou Rungus aso no ot mamakai om sera aso no koturunan tokou ot mamakai dinot boros Rungus, it bansa tokou nga amu no empolonuvan dot ulun. Ka dit panambarasan vokon, ong ajadi ino, na natanus no it bansa tokou.

Engin oku mongogovit kanangan ko it tangon (lagenda) dot nunuk ragang. Atalahas dot ino dino baiko tangon (lagenda) om aso bukti saintifik. Mirad i dit lagenda si Tanggang antawa Lagenda Putera Buluh Betong. Varo implikasi dot amu avantang ong toudon tokou inot tangon dino. Inot tangon dino kagama dot momurimon it Rungus dot yosido dino sub-etnik antawa suku kaum dot Kadazandusun. Anjadi minsan po ma ko osukup it kobuatano (ciri-ciri) diti bansa Rungus dot iso ot bansa dot unik, sera ogovitan ino tangon dino, mad momurimon no it Rungus dot yosido dino baiko suku kaum dot Kadazan.

Ohongkob oku dot insan tadau it identiti diti bansa Rungus, okon ko baiko amu atalahas ino i nga atanus tantu. Sebelum diti, ong dohon dot penilaian, mad ogos-ogos ong mad mumba tumanus it identiti dot bansa tokou Rungus sid mato dot Rakyat Malaysia keseluruhan om Kerajaan Malaysia. Tu keso, ogumu ot bansa Rungus dot sid surat beranak dau, nokosurat ngaran bansa dau Kadazan antawa Dusun. Om perayaan nga baiko milang tokou dot kamatan (perayaan dot Kadazandusun). Atag po ong bianono tu sed JPN (Jabatan Pendaftaran Negara) nga monorima no yoti dot ngaran bansa dot Rungus om inono om perayaan dot Rungus nga noguli tokou no vagu iti Magahau.

Ong otopot, sokoviai it riniba iso no ot inantadon topot sera nokopitanid no it boros om kobuatano (culture), na it bansa nga nokopitanid no vagu. Okon ko baiko Kadazan, Dusun om Rungus ot iso ot inantadon om okon ko sed nunuk ragang ot inantadon. It Rungus, Kadazandusun, Murut, Paitan om sokoviai it gulu korikot sid Borneo (“the superstock of Borneo”), iso no ot inantadon inono sid ihud dot M (mtDNA Markers) om M4 (Y Chromosome Markers), topot it boros om kobuatano (culture) ditokou nokopitanid no. Itokou diti Rungus, yoti Kadazandusun, Murut, Dayak, Lundayeh om sokoviai it bansa sid Malaysia, enizo iso ot inantadon inono I Adam om I Hawa (Afrika Utara), topot biano, enizo mingkakat posurut dit bansa dau kondiri om mitatabang mongurug om pembulai dit bansa dot Malaysia.


BIBLIOGRAFI

McAndrew, J. Deep Roots?: New DNA tests may reveal your ancestry, but researchers urge caution when interpreting result. Retrieved Nov 10, 2010, from the world wide web: http://www.utexas.edu/features/2007/ancestry/

___________________________________________